Die Fakawi aluminiumraam en seilkappie het sy ontstaan in 1996 gehad deur die eienaars, Adrew en Almarié Murray, se behoefte aan 'n liggewig kappie wat maklik deur een of twee persone op 'n Land Roverbakkie opgesit of afgehaal kan word. Op daardie stadium was daar nie plaaslik vervaardigers wat so produk op die mark gehad het nie. Die enigste alternatief was om 'n seilkappie vanuit Engeland te bestel. Die Britse produk was egter baie duur en het lank geneem om te bekom, terwyl die produk van gegalvaniseerde pyp is wat maklik roes. Daar is gevolglik besluit om 'n aluminiumraam en seilkappie vir eie gebruik te vervaardig. Die eerste produk het egter soveel belangstelling ontlok dat die Fakawi raam en seil ook vir kliënte vervaardig is.

Sederdien is die raam en seil met behulp van kliënte ontwikkel tot 'n duursame produk wat as standaardproduk vir alle Land Rovers en die meeste Land Cruisers vervaardig word en spesiaal vervaardig kan word om op ander bakkies te pas.

Die raam word van hoë gehalte aluminmium gemaak en is nêrens gesweis nie. Die totale raam bout aanmekaar sodat vibrasie geabsorbeer kan word. Die raam is sterk genoeg om, met die aanbring van diagonale versterkings, ook 'n aluminiumdakrak of daktent te kan dra. Die feit dat vlekvryestaal en nylockmoere saam met die aluminium gebruik word verseker 'n sterk, roesvrye, liggewig en duursame produk.

Die kappie word van plaaslikvervaardigde waterdigte "ripstop" seil vervaardig en kom standaard uit met twee syruite per kant en 'n voorruit wat kan oopmaak. Die agterruit en syruite is ook van seilsonskerms voorsien wat kan op- of afrol sodat die vrag privaat gehou word. Die twee sypanele en agterpaneel kan individueel of gesamentlik opgerol word wat pak vergemaklik en selfs as 'n dakkie op 'n oop voertuig in warm weer gebruik kan word. 'n Dubbelflap beskerm die bakkie se verfwerk teen die metaalogies waardeur die tou geryg word, terwyl 'n windflap op die kajuitdak aangebring word om windturbilensie te verminder.

Die totale gewig van die alumiumraam en seilkappie op die laairuimte van 'n Land Rover 110 is ongeveer 35kg.